“هه‌ردووکمان زۆر ده‌ترسێین، به‌نهێنی یه‌کترده‌بینین، رانه‌هاتووین به‌وه‌ی درۆ بکه‌ین”

ستۆری

مانگی حه‌وت ئه‌و مانگه‌یه‌ که‌ زۆربه‌ی کارمه‌ندانی داموده‌زگاکانی سوید پشوو وه‌رده‌گرن، له‌سه‌فه‌ره‌کانیاندا له‌گه‌ڵ خۆشه‌ویست و خێزانه‌کانی خۆیان ئه‌زموونی تازه‌ وه‌رده‌گرن و خۆشی ده‌ده‌ن به‌یه‌کتر. کارمه‌ندانی سه‌نته‌ره‌که‌ی ئێمه‌ش مانگی حه‌وت پشووی خۆیان ده‌ستپێده‌که‌ن. به‌حوکمی ئه‌وه‌ی ئیشه‌که‌ی ئێمه‌ زۆرجاران گرێدراوه‌ به‌ژیانی مرۆڤێکه‌وه‌ ته‌له‌فۆنه‌کانمان کراوه‌ ده‌بێ ته‌نانه‌ت له‌مانگی پشووشدا. دوای نیوه‌رۆیه‌ک که‌ به‌ره‌و سه‌نته‌ری شار ده‌چووم و ده‌مه‌ویست چێژ له‌ هه‌تاو و گه‌رمایی و جموجۆڵی پڕ له‌ژیان وه‌رگرم، ته‌له‌فۆنی ئیشه‌که‌م هێنامیه‌وه‌ ناو ئیش.

”Kvinnojouren Nina” –
”Hej, jag heter Rawand, jag kommer att störa dig lite”
Du stör inte alls, varsågod:

من چوومه‌ په‌نایه‌ک و له‌سه‌ر یه‌کێ له‌ کورسیه‌ ته‌خته‌کانی ده‌وروبه‌رم دانیشتم، ره‌وه‌ند دوای ئه‌وه‌ی دڵنیابوو که‌ گوێی لێده‌گرم وتی:
– “راستی، من کوردم، به‌ڵام کوردیه‌که‌م زۆر خراپه‌ و ناتوانم باش باس له‌ هه‌سته‌کانم بکه‌م و ناتوانم باش خۆمده‌رببڕم به‌ کوردی”
– کێشه‌ نیه‌، فه‌رموو به‌رده‌وامبه‌ به‌ سویدی.

ره‌وه‌ند، به‌رده‌وام بوو به‌چه‌ند رسته‌یه‌ک پێشه‌کی باسی ئه‌وه‌ی کرد که‌ کچێکی خۆشده‌وێ و بریاریان داوه‌ هاوسه‌رگیری بکه‌ن، که‌چی ماڵی کچه‌ رازینین. ره‌وه‌ند وتی “ئێمه‌ یه‌کترمان زۆر خۆشده‌وێ و من ئێستا ماڵی خۆم هه‌یه‌ و ئیش ده‌که‌م، ئێمه‌ هه‌ردوکمان ئاماده‌ین بۆ ژیانی پێکه‌وه‌یی” ره‌وه‌ند وتی که‌چی باوکی ئه‌و کچه‌ی من خۆشمده‌وێ ته‌نانه‌ت نایه‌ڵێ یه‌کترببینین، ئێمه‌ هه‌ردووکمان له‌ سوید گه‌وره‌بووین و تێناگه‌ین بۆ مافی ئه‌وه‌مان نیه‌ که‌ به‌یه‌که‌وه‌بین و یه‌کترببینین، بۆیه‌ بڕیارمانداوه‌ بۆ شوێنی نادیار برۆین هه‌ردووکمان، ئێوه‌ پێتان وایه‌ ده‌بێ ئێمه‌ چی بکه‌ین، ئه‌گه‌ر رابکه‌ین، چی رووده‌دات؟”

– جارێ تۆ به‌رده‌وامبه‌ له‌ باسکردن

– ره‌وه‌ند: “هه‌ردووکمان زۆر ده‌ترسێین، به‌نهێنی یه‌کترده‌بینین، رانه‌هاتووین به‌وه‌ی درۆ بکه‌ین و بترسێن و مافمان نه‌بێ یه‌کترببینین، هیچ شتێکی هه‌ڵه‌مان نه‌کردوه‌، بۆ هه‌موو ره‌فیقه‌کانمان مافیان هه‌یه‌ ئێمه‌ نا..” ره‌وه‌ند له‌بیرکردنه‌وه‌یداو له‌ خستنه ‌ژێرپرسیاری ده‌سه‌ڵاتی باوکی کچه‌که‌دا سویدی بوو، و نه‌یده‌توانی تێبگا که‌ بۆ مافی ئه‌وه‌ی نیه‌ له‌گه‌ڵ ئه‌و کچه‌ بژی که‌ ئه‌و خۆشیده‌وێ. ره‌وه‌ند به‌رده‌وام بوو وتی: ” ئێمه‌ هه‌ردووکمان ده‌زانین که‌ ناتوانین بێ هاوسه‌رگیری له‌گه‌ڵ یه‌کتر بژین، بۆیه‌ بڕیاری هاوسه‌رگیرمان داو رێزمان هه‌یه‌ بۆ باوه‌ره‌کانی کولتوری خۆمان، ئه‌و کچه‌ی من خۆشمده‌وێ کورد نیه‌، به‌ڵام ئه‌وانیش هه‌ر وه‌ک کورده‌کانی خۆمان بیرده‌که‌نه‌وه‌، بۆیه‌ که‌سوکاری من چوون بۆ داوای و که‌چی تا ئێستا رازی نه‌بوون و به‌هیچ شێوه‌یه‌ک قه‌بوڵی ناکه‌ین.”

له‌ مانگی حه‌وتدا ره‌وه‌ند چه‌ندین جار ته‌له‌فۆنی ده‌کرد و باسی له‌ترس و خۆفه‌کانی خۆی و ئه‌و کچه‌ ده‌کرد که‌ خۆشیده‌وێ، رۆژێ وتی: “لارا، چه‌ند رۆژێک نانی نه‌خواردوه‌ و له‌بێهێزیدا بوراوه‌ته‌وه‌، که‌چی دایکوباوکی نه‌یانبردوه‌ بۆ خه‌سته‌خانه‌ و هه‌ربۆیان گرنگ نه‌بووه‌، کاتێک لارا باسی ره‌وشی خۆیم بۆده‌کا له‌ماڵه‌که‌ی خۆیاندا، من زۆر ده‌ترسێم و نازانم چی بکه‌م…”

کاتێک مرۆڤ گوێی له‌ چیرۆک و خه‌مه‌کانی گه‌نجێک ده‌بێ، و ده‌بینێ که‌ چۆن هێزی بیکردنه‌وه‌ و ئینێرژی ئه‌و گه‌نجه‌ به‌ کۆمه‌ڵێک شته‌وه‌ ده‌فه‌وتێ که‌ له‌ مێژووی ژیانی مرۆڤێکی ئازاد و خاوه‌نمافدا که‌لێن دروستده‌کا و به‌به‌رده‌وامی ئه‌م که‌لێنه‌ له‌ ژیانی داهاتوویدا دوایده‌خات.
سه‌نته‌ری نینا پێش هه‌موو شت ده‌زانێ که‌ ئه‌م که‌یسه‌ زۆر هه‌ستیاره‌، هه‌ر بڕیار یان ئیشبۆکردنێکی که‌ زۆر دارێژراو بیرلێکراوه‌ نه‌بێ ده‌توانێ ببێته‌ هۆی خراپتربوونی ره‌وشی ئه‌م دوو گه‌نجه‌. بۆیه‌ یه‌که‌م هه‌نگاوی یارمه‌تی ئه‌م سه‌نته‌ره‌ بۆ ئه‌وان، دیتنی هه‌ردوو گه‌نجه‌که‌ بوو، بۆ ئه‌وه‌ی له‌نزیکه‌وه‌ باشتر باس له‌ ره‌وشی ئێستایی خۆیان بکه‌ن. دوای ئه‌وه‌ی که‌ به‌وردی ره‌وشه‌که‌ی ئه‌وان روونکرایه‌وه‌ و له‌سه‌ر ره‌زامه‌ندی سه‌نته‌ر و ئه‌م دوو گه‌نجه‌ خۆیان بریار درا که‌ قسه‌ له‌گه‌ڵ باوکی کچه‌که‌دا بکرێ، بۆ ئه‌وه‌ی ئه‌م حاڵه‌ته‌ به‌ره‌وخراپبوونێک نه‌روا که‌ چاره‌سه‌ری ئه‌سته‌م بێ و تراژیدیای لێنه‌که‌وێته‌وه‌.
نوێنه‌ری سه‌نته‌ری نینا هه‌ڵآڵه‌ رافع له‌م په‌یوه‌ندیه‌دا وتی: “هه‌ڵسوکه‌وتمان له‌گه‌ڵ ئه‌م که‌یسه‌ ده‌بێ زۆر به‌وردی و ئارامی بێ، چونکه‌ کوڕ و کچه‌که‌ زۆر گه‌نجن و ویستی ئه‌وه‌ی به‌یه‌که‌وه‌ بژین ده‌توانێ توشی ریسکی گه‌وره‌یان بکات ” رافع به‌رده‌وام بوو و وتی “له‌به‌ر ئه‌وه‌ی ئه‌م دوو گه‌نجه‌ له‌ سوید گه‌وره‌بوون و زۆر باش له‌سه‌ر مافه‌کانی خۆیان ده‌زانن و ناتوانن به‌ پێوه‌ره‌کان و نۆرمه‌کانی کولتورێکی تر بژین و ئه‌وان به‌ مافی زۆر ئاسایی خۆیانی داده‌نێن که‌به‌یه‌که‌وه‌ بژن، به‌ڵام ئه‌وه‌ی جێگای خۆشحاڵیه‌ هاوکات هه‌ردووکیان تێگه‌یشتنیان بۆ تێڕوانینه‌کانی دایکوباوکیان هه‌یه‌ و ئاماده‌یی ئه‌وه‌یان تێدایه‌ که‌ تا ئه‌و شوێنه‌ی بۆیان بکرێ به شێوه‌یه‌کی ئارام و‌ مه‌نتقیانه‌ کێشه‌که‌ چاره‌سه‌ر بکه‌ن تا کێشه‌ی گه‌وره‌ترو ترسناکی لێنه‌بێته‌وه‌‌.”
رافع به‌رده‌وام بوو له‌سه‌ر باسکردنی چۆنیه‌تی ئیشکردنی سه‌نته‌ری نینا بۆ ئه‌م که‌یسه‌ و وتی: ” له‌به‌ر ئه‌وه‌ی ئێمه‌ ئه‌زموونێکی زۆرمان هه‌یه له‌سه‌ر ئیشکردن له‌گه‌ڵ خێزانه‌ په‌نابه‌ره‌کان له‌ سوید، ده‌زانین به‌چ شێوه‌یه‌ک هه‌ڵسوکه‌وت بکه‌ین و چۆن چۆنی رێگا بکه‌یه‌نه‌وه‌ بۆ دیالۆگ له‌گه‌ڵ که‌سوکاریان. یه‌که‌م هه‌نگاومان بۆ ئه‌وه‌ی باوکی ئه‌و کچه‌ ببینین، ئه‌وه‌بوو که‌ یه‌کێک له‌ نزیکترین هاورێکانی ئه‌و باوکه‌ ببینین، دوای ئه‌وه‌ی ئاڵوگۆری بۆچوونمان کرد له‌گه‌ڵ هاورێ نزیکه‌که‌ی، ئه‌ویش خۆی ئاماده‌ بوو که‌ ببێته‌ هاوکارێک بۆ ئاسان ده‌ستراگه‌یشتن به‌ باوکی ئه‌م کچه‌. ئێستا له‌ پرۆسه‌ی قسه‌کردنداین له‌گه‌ڵ باوکه‌که‌، هه‌رچه‌نده‌ باوکه‌که‌ به‌ هیچ شێوه‌یه‌ک ئاماده‌یی دیالۆگی نیه‌ به‌ڵام هه‌ر له‌ هه‌وڵداین له‌گه‌ڵیدا، له‌ ئیستادا کاریان نه‌گه‌یشتوه‌ به‌ دامو ده‌زگای ده‌وڵه‌ت و پۆلیس، و ئه‌وه‌نده‌ی بۆمان بکرێ هه‌وڵده‌ده‌ین‌ له‌ ڕێگای گفتوگۆوه‌ کێشه‌که‌ چاره‌سه‌ر بێت، تا هه‌م ئه‌و دوو گه‌نجه‌ بتوانن ئازاد بن و له‌ مافه‌کانی خۆیان به‌هره‌مه‌ند بن، و‌ هه‌م باوکه‌که‌ یان خێزانی کچه‌که‌ بگه‌یه‌نینه‌ ئه‌و باوه‌ڕه‌ی که‌ ئه‌و دوگه‌نجه‌ گه‌وره‌ ساڵن و ده‌توانن بڕیار له‌سه‌ر ژیانی خۆیان بده‌ن، تا ئه‌و شوێنه‌ی که‌ بۆمان بکرێت خۆمان ده‌رگیر ده‌بین له‌گه‌ڵ باوک و دایکی کچه‌که‌دا، به‌ڵام له‌ شوێنێکدا که‌ زانیمان ده‌گاته‌ت ئه‌وه‌ی پێویست به‌ لایه‌نی تر بێت
بێگومان ده‌بێت په‌یوه‌ند بکه‌ین پێیانه‌وه‌.”

سەنتەری نینا