وانەکانی ئەحلام مەنسور

216

چه‌ند قسه‌یه‌ک له‌ ناخمه‌وه‌ ……
هه‌رچه‌نده‌ ئه‌و له‌ دیمانه‌یه‌کی (کۆوار)دا، “ئاماژه‌ى داوه‌ به‌وه‌ى ئه‌و له‌ دواى مردنی نایه‌وێت كه‌س كۆرِى بۆ بگرێت و گوتبووى “دوو كوڕم راسپاردوون بۆ ئه‌وه‌ى دواى مردنم كۆڕم بۆ نه‌گێڕن، كه‌سانێك كه‌ ئێستا سه‌ردانم نه‌كه‌ن، حه‌زناكه‌م له‌ دواى مردنیشم بێن كۆرِو قسه‌م بۆ بكه‌ن”. سیتاتی (ئه‌‌رسه‌لان ڕه‌حمان).

هه‌واڵی مه‌رگی هه‌مو گیانمی هه‌ژاند، زۆر ده‌مێک بوو ده‌مویست له‌ نزیکه‌وه‌ بیبینم به‌ڵام به‌داخه‌وه‌ که‌ نه‌متوانی ئه‌و ئاواته‌م بێنمه‌ دی، جگه‌ له‌وه‌ی که‌ هه‌ندێ شتم لێ خوێندوه‌ته‌وه‌و، هه‌ندێکم له‌سه‌ر بیستوه‌و، جارێکیش له‌ دیمانه‌یه‌کی ته‌له‌فزیۆنیدا که‌ من و چه‌ند که‌سێکی تریشی تێدا بوو، به‌ ته‌له‌فۆن له‌گه‌ڵ ئه‌ویشدا قسه‌کرا. له‌و قسانه‌یه‌وه‌ زانیم که‌ ئه‌و مرۆڤە‌ چه‌نده‌ خۆیه‌تی و چه‌نده‌ به‌ دڵسۆزی و چاونه‌ترسی و ڕاستگۆیانه‌ له‌گه‌ڵ خۆیی و ده‌وروبه‌ره‌که‌ی، سنوره‌ دروستکراوه‌کانی کۆمه‌ڵگای به‌زاندوه.

له‌و گفتوگۆیه‌دا زۆر به‌ ڕاشکاوانه‌ باسی له‌ داڵده‌دان و کۆمه‌کی ئه‌و کچانه‌ ده‌کرد که‌ پێش پرۆسه‌ی هاوسه‌رگیری سکیان بوه‌و ڕوبه‌ڕوی هه‌ڕه‌شه‌ی خێزانه‌کان بونه‌ته‌وه‌ له‌ ساڵه‌کانی 70 دا، هه‌ر ئه‌و کاتانه‌ به‌ ئاشکرا له‌ شاره‌که‌ی و له‌به‌رچاوی خه‌ڵکه‌وه‌ به‌رگری و داڵده‌ی داون و له‌ مردن ڕزگاری کردون…
ئامانجی سه‌ره‌کی خه‌مه‌کانی بوە بۆ ژنان و مرۆڤایه‌تی، و هیچ سازشێکی لەسەر پرینسیپەکانی نەکردوە. تەنها کارو دڵسۆزیەکانی بون بە سەرمایەو ناوبانگ بۆی و به‌ کۆمه‌ڵگای ناساند‌ وەک کەسایەتیەکی ڕاستەقینە نەک دروستکراو. هەر بۆیە سەرەڕای یاخی بوون و سنوربەزاندنەکانیشی، توانیویەتی ڕێز و خۆشەویستی کۆمەڵگا بەدەستبێنێ تەنانەت لای نەیارەکانیش.

خود بوون و جوانیەکانی (ئەحلام مەنسور) کەمیابە، ئەو هەم وەک ژنێک توانیویەتی بژی و ماف بە ژنبونی خۆی بدات، هەم وەک قەڵغانێکیش بۆ ژنانی دەوروبەری… ڕاستگۆیی و بوێری و نەبونی ماسک، ئازادی و مرۆڤبونی ڕاستەقینەی پێبەخشیوە.
کاتێک که‌ ده‌رس له‌ هه‌ڵسوڕاوانی ژنان و ناودارانی ڕاشکاوو سنوربه‌زێنه‌ جیهانیه‌کان وه‌رده‌گرین زۆر باشه‌، به‌ڵام که‌سانی وه‌ک (ئه‌حلام مه‌نسور) وانه‌کانی بۆ ئێمه‌ کاریگه‌رتره‌، له‌به‌ر ئه‌وه‌ی هه‌ڵقوڵاوی هه‌مان واقیع و بارودۆخی ئه‌و شوێنه‌یه‌ که‌ تیا ژیاوین و کاری تێدا ده‌که‌ین.

ئەحلام، دیبۆڤوار دروستی نەکردوە، بەڵکو هاوشێوەی یەکن، هەریەکە لە جوگرافیاو زەمەنێکی جیاوازدا. ئه‌حلام، وانه‌کانی (سیمۆن دیبوڤوار) و (سارته‌ر)ی به‌ کۆپی و به‌ ڕوحێکی ساردوسڕه‌وه‌ وه‌رنه‌گرتبوو، به‌ڵکو ئه‌زمونی لێوه‌رگرتبون و له‌گه‌ڵ خۆبون و ئه‌ندێشه‌و خه‌مخۆریه‌کانی خۆیدا له‌ ئاوێته‌یه‌کی نوێ و گونجاودا کردبونی به‌ (وانه‌کانی ئه‌حلام) له‌ ئه‌ڵوه‌نه‌وه‌، و بۆ شێوه‌ی کارکردن و ڕوبه‌ڕوبونه‌وه‌ی یاساو ئاین و ده‌سه‌ڵات له‌ کۆمه‌ڵگایه‌کدا که‌ خۆی تێدا ده‌ژی، و به‌ کۆده‌ کۆمه‌ڵایه‌تی و سیاسیه‌کانی ئاشنایه کاری پێده‌کردن‌. تێکه‌ڵاوبونی ئه‌و له‌گه‌ڵ خه‌ڵک و ژنان و گه‌نج، ده‌ستوپه‌نجه‌ نه‌رمکردنی له‌گه‌ڵ کێشه‌کانیاندا، ئاماده‌بونی له‌ مه‌یداندا، ببوه‌ هه‌وێنی سیمای کۆمه‌ڵایه‌تی بون و هێزی دابو به‌ کارو به‌رهه‌مه‌کانی. ئه‌وه‌ش کلیلی سه‌رکه‌وتنه‌کانیه‌تی.

-ئه‌حلام مه‌نسور له‌ به‌شێک له‌ دیمانه‌یه‌کی مندا له‌ ئێستا نیوز به‌ که‌مێک ده‌سکاریه‌وه‌
ئەگەر تەماشای مێژووی سەرهەڵدان و دروستبوونی بزوتنه‌وه‌ی یه‌کسانیخوازی ژنان و شەڵتەرەکانی ئەوروپا بکەین، لەسەرەتادا لە ماڵەکانی خۆیاندا دەستیان پێکردوە بە کاری خۆبەخش تا بوەتە سونەت و یاساو بەسەر سیستەمی سیاسیدا سەپاوە، هه‌ر له‌وێشه‌وه‌ توانیویانه‌ به‌شدار بن له‌ گۆڕین و وه‌لانانی ده‌سه‌ڵاته‌کاندا. من لێرەدا باسەکەم ئەوە نیە کە دەبێت هەمان پرۆسە تەی کەین بەبێ گوێدانە ڕێگریە سیاسیەکان یان ئیمکانیەتی ئابوری یان کۆمەڵایەتی، بەڵام بۆ لەساڵانێکی زوو کەسایەتیەکی چاونەترسی وەک (ئەحلام مەنسور) توانیویەتی ئەم کارە بکات، هەروا ئێستاش پێویستمان بە چەندەها ئەحلام مەنسورە کە دەستپێشخەرو چاونەترس بەرگری کەری مافی مرۆڤ و ئازادی بن لەکۆمەڵگادا و به‌ کرداری بکه‌نه‌وه‌، گرنگی کاری مەیدانی و جەماوەری و خۆبەخشیش لە پرسە کۆمەڵایەتیەکاندا کرۆک و ڕۆحی کاره‌کانمانه‌.

لە مێژودا کەسایەتیە ڕاستەقینەکان تا لە ژیاندان، نابنە جێگای باسو خواستو پیاهەڵدان، داستانەکانیان زیاتر دوای لەدەستدانیان بڵاو دەبێتەوە، بەڵام به‌ هیوام بتوانین کەڵک لە جوانیەکان و وانەکانت وەرگرین بۆ به‌رده‌وامی دان بە‌ ڕیگاکه‌ت، هه‌میشه‌ نه‌مر.

هه‌ڵاڵه‌ ڕافع
سوید
2013-01-10

print