جنێڤ.. دوو كچە ئێزدی بەسەرهاتی رفاندنەکەیان دەگێرنەوە

هەولێر

وەزارەتی مافی مرۆڤی عێراق رایگەیاند، لە 8ـی مانگی ئاداری داهاتوو خولی داهاتووی ئەنجوومەنی مافی مرۆڤ لە شاری جنێڤ دەستپێدەكات، بۆیە بڕیارمانداوە دوو كچە ئێزدی قوربانیی دەستی گرووپی داعش بنێرینە جنێڤ بۆ ئەوەی لە پێش ئەنجوومەنەكە بەسەرهاتی خۆیان بگێرنەوە.


كامیل ئەمین، گوتەبێژی وەزارەتی مافی مرۆڤی عێراق بە تۆڕی میدیایی رووداوی راگەیاند: "لە 8ـی مانگی ئاداری داهاتوو خولی داهاتووی ئەنجوومەنی مافی مرۆڤ لە شاری جنێڤ لە سویسرا دەستپێدەكات و بۆ چەند هەفتەیەك بەردەوام دەبێت، بۆیە وەزارەتی مافی مرۆڤ بڕیاری دا دوو كچە ئێزدیی قوربانی دەستی داعش بنێرینە جنێڤ بۆ ئەوەی لە پێش ئەنجوومەنەكە بەسەرهاتی خۆیان بگێرنەوەو شایەدی لە دژی گرووپەكە بدەن، ئەم شایەدییەش دەبێتە بەڵگەیەكی زیندوو لە سەر تاوانەكانی داعش لە عێراق".

كامیل ئەمین باسی لەوەکرد، کە ئەو دوو كچە پێشتر لەلایەن داعشەوە رفێندرابوون و فرۆشرابوون، بەڵام دواتر خۆشبەختانە لە دەستی داعش رزگاریان بوو، یەكێك لە دوو كچانە بە رێگەی كەسێكی عەرەبی دانیشتووی شاری فەللوجە لە داعش كڕدرابوو و دواتر ئەو كەسە ئازادی كرد، ئەو دوو كچە پێشتر نێردرانە بەغدا و چاویان بە وەزیری مافی مرۆڤ كەوت و باسی بەسەرهاتی خۆیان بۆ كرد".

گوتەبێژی وەزارەتی مافی مرۆڤ ئاماژەی بەوەشدا، كە "یەكێك لە كارنامەكانی خولی داهاتووی ئەنجوومەنی مافی مرۆڤ خستنەڕووی راپۆرتێكی ئەو تیمەیە، كە خودی ئەنجوومەنەكە لە مانگی 9ـی ساڵی 2014 بڕیاری دا رەوانەی عێراقی بكات بۆ ئاشكراكردنی راستییەكان و دواتر تیمەكە، كە 29 ئەندامی لەخۆدەگرت، هات بۆ عێراق و نووسینگەكانی لە هەولێر و دهۆك كردەوەو بەردەوام سەردانی پارێزگاكانی دیكەی عێراقشی دەكرد".

بەپێی گوتەی كامیل ئەمین، چاوەڕوان دەكرێت راپۆرتی ئەو تیمە "دڕندەیی تاوانەكانی ئەو گرووپە بخاتەڕوو بە رێگەی شایەدی قوربانییەكانی داعش، كە رزگاریان بووە".

گرووپی داعش لە مانگی تەمموزی ساڵی 2014 هێرشێكی فراوانی كردە سەر شارۆچكەی شنگال و هەموو ناوچەكانی دەشتی نەینەواو دەرئەنجام بە هەزارەها هاونیشتمانی کوردی ئێزدی كوشت و بەپێی سەرچاوە پەیوەندیدارەكان، بە هەزاران كچ و ژنە ئێزدی رفاندو دواتر وەك كەنیزە لە ناوچەكانی ژێردەستی خۆی كڕین و فرۆشتنی پێوەكردن.

Rudaw ( http://rudaw.net/sorani/world/050220155 )